آتی ہے پوَ ن ، جاتی ہے پوَن ~ ابن انشاء

جوگی کا بنا کر بھیس پھرے

برہن ہے کوئی ، جو دیس پھرے

سینے میں لیے سینے کی دُکھن

آتی ہے پوَ ن ، جاتی ہے پوَن

پھولوں نے کہا، کانٹوں نے کہا

کچھ دیر ٹھہر، دامن نہ چھڑا

پر اس کا چلن وحشی کا چلن

آتی ہے پوَ ن ، جاتی ہے پوَن

اس کا تو کہیں مسکن نہ مکاں

آوارہ بہ دل ، آوارہ بہ جاں

لوگوں کے ہیں گھر، لوگوں کے وطن

آتی ہے پوَ ن ، جاتی ہے پوَن

یہاں کون پوَن کی نگاہ میں ہے

وہ جو راہ میں ہے، بس راہ میں ہے

پربت کہ نگر، صحرا کہ چمن

آتی ہے پوَ ن ، جاتی ہے پوَن

رکنے کی نہیں جا، اٹھ بھی چکو

انشاء جی چلو، ہاں تم بھی چلو

اور ساتھ چلے دُکھتا ہُوا مَن

آتی ہے پوَ ن ، جاتی ہے پوَن